القائمة


الفرق مابين العربية النيسان صني الشكل القديم والشكل الجديد؟

قبل منقولكم الفرق ما بين النيسان صني الشكل القديم  والشكل الجديد خلينا نعرف أصل العربية واتعملت امتي وفين.

المنشأ

نيسان صني هي سيارة عائلية رخيصة الثمن ومتينة الصنع من صنع شركة نيسان اليابانية, بدأ تصنيعها في اليابان منذ عام 1966م باسم داتسون 1000 ولسا بيتم تصنيعها في اليابان ويتم تجميعها في بعض بلدان شرق آسيا لتمد الأسواق الأفريقية والأمريكة والشرق أوسطية.

وتم تصنيع السيارة في مصر من عدت سنوات وحازت على المركز الأول في السيارات الصغيرة، ومن منافسيها الكورولا من التويوتا والسيتي من الهوندا والأكسنت من الهيونداي.

نيسان صني الشكل القديم N16

نيسان صني N16 الشكل القديم

 

النيسان الشكل القديم EX SALOON  مستمر إنتاجها حتي الأن (مانويل – أوتوماتيك) بأير باج واحد للسائق وبدون منظومة  ABS

المميزات:

– جميع قطع غيارها متوفره علي موقع أوتوبارتس تقدر تطلبها من الموقع وتجيلك لحد باب البيت

– تتملك النيسان Ex Saloon ماتور ماتور محترم جداَ بسعه 1600cc وقوة 118 حصان

– بتتميز النيسان صني الشكل القديم بسحب قوي وتجميع رائع والعربية ممكن تديك طاقة اكبر فوق ال 4000RPM بس كله علي حساب البنزين

– النيسان الشكل القديم بتتميز بصاج تقيل وقوي لكن مشكلتها في الأكصدامات نقطة الاتصال مالبادي ضعيفة لكن الميزة ان الأكصدام مش كبير زي الشكل الجديد والعربيات الجديدة تلاقيه واخد لغايه الرفرف وديه ممكن تشوفها ميزة أو عيب.

-الشكل القديم معروف ان العفشة بتاعته نشفة أنشف من الشكل الجديد لكن لو جينا قارنه مع السيراتو هتلاقيه انعم بس لو قارينه مع التيواتا هتلاقيه أنشف.

-الثبات في النيسان صني الشكل القديم قوي جدا فوق الممتاز هتساعدك علي الطريق المفتوح والملفات وفي الغرز, حتريك جداَ في السرعه العالية, وفيه ميزان بينزل مع النيسان صني سوبر صالون أمامي وخلفي هيدي للعربية ثبات أكتر.

– الكاوتش بينزل ليها بريدجستون

-الحوض واسع جداَ وسهل صيانتة

-الرؤية كوية جداَ بسبب ان العربية مش عالية والمرايات الجانبية اكبر والرؤية الأمامية ممتازة

– استهلاك البنزين العربية بتستهلك علي حسب رأي الناس اللي بتركبها من 180 ل 220 كيلومتر في الصفيحة الواحدة ومتنساش ان العربية 1600CC

– بار الحماية امام الماتور بار صلب بكامل وش العربية لتجنب الصدمات الامامية والجانبية.

العيوب :

– كرسي السواق ناشف جدا

– فيه مشاكل في الضفيرة مش هتأثر اوي بس لو غيرتها هتروح

– الكنبة هتبقي ضيقة لو رجعت كورسي السواق بس لو حد مش طويل قعد وراك مش هينزعج

– التابلوه شكله كلاسيك جدا فيه ناس ممكن تحبه كدا اولا ديه اراء.

نيسان صني الشكل الجديد بداية من 2013

نيسان صني الشكل الجديد N17

الصني الشكل الجديد “N17” بتتوفر بتلت فئات بس هتلاقي في كل الفئات “إيرباج للسائق والراكب الأمامي + منظومة ABS كاملة”

-أول فئة مانيوال

– ثاني فئة أوتوماتيك

-ثالث فئة سوبر صالون أو أوتوماتيك

المميزات :

– جميع قطع غيارها متوفره علي موقع أوتوبارتس تقدر تطلبها من الموقع وتجيلك لحد باب البيت

-النيسان صني الشكل الجديد واسعة جداَ أوسع عربية في فئتها بدون مبالغة مع تصميم داخلي جميل

– استهلاك البنزين احسن من الشكل القديم لأن الماتور 1500CC

– خامات الكراسي والتنجيد ممتازة

– مروحة خلفية لتوزيع الهواء للمقصورة الخلفية

– الثبات كويس جدا لأن فيها ميزان امامي وخلفي في كل الفئات بس لأن العربية عالية هتتأثر بالهواء

– التقفيل المصري ممتاز مش هتعرف تفرق ان ده مصري من جودته

– السوبر صالون كماليتها كتير وممتازة تستاهل تزود الفلوس حبة

– التابلوه تصميمه شيك جدا وعصري

– عدادات ديجتال جميلة

– كمبيوتر للرحلات

– طارة مالتي فانكشن

– النواكل في الطارة والأبواب والطارة والفتيس

– سبويلر

– الأيموبلايزر

– باور ستيرنج كهرباء

العيوب :

– الماتور 1500CC وهورس باو 108 حصان “ده الرقم اللي في التوكيل لكن في الحقيقة هيا 99حصان” و 137 عزم نيوتن لكل متر بس ده ممكن تعتبره ميزة لو انت بتبص للتوفير علي خساب القوة .

– الصاج ضعيف جدا في الشكل الجديد ولو اتخبطت بتأثر في جامد

– العفشة ناعمة

– الثبات أقل من الشكل القديم لأن السقف عالي

– الكاوتش ماكسيس صيني

– الحوض ضيق جدا هيبقي صعب في الصيانة بس جي علي حساب الصالون الواسع

– الرؤية محدودة بسبب ارتفاع العربية ومرايات الجناب صغيرة

– أماكن التخزين اقل من الشكل القديم

– بالنسبة للتكيف والشنطة مفيش فرق مبين الأتنين

ديه ابرز الفروق مابين النيسان صني الشكل القديم والشكل الجديد وديه جمعناها عن طريق اراء ملاك العربيات ديه وتقيمهم ليها, وكمان ممكن تشوف أسعار قطع غيارها وتشتريها من هنا : قطع غيار نيسان صني

لو عجبك المقال اعمل شير علي الفيسبوك او اي مواقع تواصل بتفضلها علشان الكل يستفاد ولو حابب تعرف اكتر عن العربيات تابع المدونة بتاعتنا

 


اترك تعليقاً

أضف تعليق